Giro aparta finalean.

Maider Arregi Markuleta oñatiarra da 2014. urteko Eskolarteko bertsolari txapelduna, eta Aitor Servier Etxexuri azkaindarra, berriz, txapeldunordea. Iragan larunbatean jokatu zen Orioko Karela kiroldegian, Euskal Herriko Eskolarteko Bertso Txapelketaren XVI. edizioa. Oso giro ona izan zen finalean, eta bertso maila handia erakutsi zuten parte hartu zuten 15-18 urte bitarteko hamaika bertsolariek (Peru Abarrategi Sarrionandia, Maddalen Arrausi Fernandez de Retana, Asier Galarza Garai, Aitor Bizkarra Ruiz, Iñigo Ibañez Aramendi, Nahia Sasco Etxeberri, Mikel Lasarte Zia, Maddalen Lopez Tapia eta Ibai Capot Tornari izan ziren beste bederatziak).
 
Ikastolen Elkarteak eta Bertsozale Elkarteak elkarlanean antolatuta egin da Eskolartekoa, eta aurten Euskal Herriko Bertso-Eskolen Egunarekin batera ospatu zen finala. Hala, txapelketa beraren ondoren, bazkaria, bertso-eskolen emanaldia eta erromeria ere izan ziren Orion.